有朋自遠方來，不亦劏乎。香港旅遊業本來已經七國咁亂，醜聞多多，加上日前發生嘅毆斃內地客事件，更加臭名遠揚，乜嘢形象都冇晒，「好客之都」呢塊招牌睇怕摺埋都得咯。
好事不出門，醜事傳千里，呢單懷疑因為購物爭拗而引致嘅命案迅速傳遍大江南北，網上群情洶湧，唔少內地居民震驚之餘，直指事件完全顛覆對香港嘅印象，有人甚至呼籲唔好再去購物，「珍惜生命，遠離香港」。咁又係吖，出外旅遊本來係開開心心嘅事，結果搞到客死異鄉，係人都怕怕喇。
呢，有內地傳媒話喎，近年關於香港旅遊嘅負面新聞從未斷過，而今次惡劣程度前所未有，可能只係偶然，但好難唔將此事同其他中港衝突事件擺埋一起，從而得出香港社會針對內地客嘅暴戾之氣不斷升級。亦有評論認為，今次事件進一步損害香港喺內地人心中嘅形象，要消除兩地民眾誤解，主要應由香港社會承擔。
即係咁，近年中港矛盾不斷惡化，主要係香港尤其係激進團體嘅責任，呢點無疑係事實，但講到旅遊業嘅亂象，港府固然責無旁貸，內地當局亦難辭其咎嘅咋。
係人都知，內地話就話有《旅遊法》監管低價團，可惜漏洞多多，唔少旅行社走法律罅，喺深圳組織廉價散拼團，裏面嘅「影子團友」除咗做媒，仲負責強迫團友購物，一見到有人拒絕消費或者買唔夠數，就會出手教訓，今次懷疑就係咁樣搞出人命。好明顯，內地當局對呢啲散拼團放任自流，成為旅遊業亂象嘅根源，內地傳媒與其叫香港社會承擔，不如督促內地當局加強監管仲好喇。
當然，咁唔表示港府冇責任。正如業界人士話齋，本港雖然有旅遊業議會監管旅行團，但只能要求自律，根本解決唔到問題，旅議會已經完成歷史使命。冇錯嘞，旅議會「自己人管自己人」，係人都知唔掂喇，偏偏港府闊佬懶理，幾年前已承諾成立旅遊業監管局，點知拖到依家仲係無影無蹤，問你服未。
所以話，五十步唔好笑一百步，香港旅遊業烏煙瘴氣，亂象叢生，國產官僚同港產官僚都有責任，應該各打五十大板至啱。對於今次事件，業界人士要求相關部門盡快查明真相，依法追究，並呼籲業界自律，不應強迫購物。其實講乜都係假，如果當局唔盡快堵塞漏洞，切實監管，就算今次查明真相，可能好快又有下一次嘅咋。
正所謂，黃台之瓜，何堪再摘，早已步入寒冬嘅旅遊業，再經過今次打擊，想唔死都幾難！