政情：今日你上鏡：何俊賢拜山拉大隊

尋日重陽節好多人登高掃墓，立法會漁農界議員何俊賢（高佬賢）都唔例外，全家大約三十人帶埋燒豬去屯門兩個地方拜山，算係大陣仗。高佬賢話，尋日十點幾已經去到雞伯嶺拜太公，下午就去青山拜公公，成五點鐘先走，今次足足少咗四個男丁幫手，佢就負責攞咗二十幾罐汽水。原來根據佢哋何家傳統，要嫡孫先有份抬燒豬，高佬賢話自己未夠班喎。講開風高物燥山火多，高佬賢話聽啲消防員講，近嚟多咗人放孔明燈，好易引起山火，都係奉勸大家咪一時貪玩釀成大錯。