現時樓市雙軌運行，一手樓長賣長有，但二手樓就交投淡靜，部分減價才能成交，多家大行因而唱淡樓市。雖然過去一年多嘅加息陰霾影響置業者信心，但立法會議員謝偉俊（Paul）就無有怕，根據立法會議員利益申報，Paul於上周申報增持多三個物業，分別位於佐敦和跑馬地，但減持咗中環及深圳兩個物業，換句話喺香港多咗兩個物業。
Paul本身擁有嘅物業主要集中喺港島區，但亦有涉足內地及美國。距離上次申報相隔一年半，佢終於擴張版圖到九龍區嘞，現時合共擁有廿五個物業，都算是「立法會樓王」。
Paul話，今次新物業係同另一半聯名持有，主要都係用作放租，佐敦兩物業已成功放租，但跑馬地物業就仲未交樓。佢明言香港樓市不明朗，但現時利息低，加上屬於長線投資，買樓「當支持香港」！
佢又認為，海外投資猶如隔山買牛，難以管理，未來或會主力投資香港物業。佢又話，自己多公職在身，又要顧及律師樓工作，難以對股票市場作出即時反應，難怪會咁熱衷投資「磚頭」喇。