政情：辦公室開張 狄志遠收「蝙」
新思維籌委會召集人狄志遠（Dick）最近在社交網站上載多張相片，就係佢喺油麻地和富商業大廈嘅新辦公室，相中所見，佢除咗掛咗幅自己畫嘅「黃傘畫」外，仲搞到辦公室好似個迷你展覽館咁，展示一大批蝙蝠俠Ｑ版公仔。
阿Dick一向係蝙蝠俠迷，佢自爆有近一百箱蝙蝠俠物品珍藏，而佢嘅新辦公室擺放嘅蝙蝠俠公仔就佔咗五至六箱，佢話望住自己鍾意嘅嘢，工作都開心啲。不過，佢擺咁多公仔喺辦公室仲有一個原因，就係屋企已經放咗五十箱蝙蝠俠物品，放滿多個儲物櫃、甚至床下底添，為免老婆「詐型」，都要收斂吓至得喇！
