中環出更：信用卡要安全 盧偉國（目及）實老婆使錢
近期因為有手機應用程式被發現能讀取感應式付款功能payWave信用卡內的個人資料，導致銀行要收回並為客戶換卡。卓妮日前喺香港電子業商會的創新科技產品獎大獎頒獎禮上，見到立法會議員葉劉淑儀及盧偉國，講起信用卡保安問題，盧偉國就話佢畀老婆張附屬卡每次完成交易後，都會傳手機短訊通知佢，佢就會即刻打電話畀老婆問清楚，唔知咁樣算唔算Check住老婆使錢呢？
盧偉國仲話，為確保信用卡冇被盜用，佢喺換卡前會多啲留意信用卡扣帳有冇可疑紀錄，逐個數核對清楚。好似現時用信用卡付款後，銀行都會發出短訊通知，就連佢畀老婆張附屬卡亦不例外，佢笑言每次一收到有關訊息，就會不厭其煩咁打電話問老婆係咪買咗嘢。雖然好似Check住晒，但相信盧太瘋狂Shopping後都有人自動找數，實在太幸福喇！
防資料被竊 葉劉冇晒符
至於做過保安局局長嘅葉劉淑儀就話事件防不勝防，佢都有使用相關信用卡，但就冇諗到有咩方法防止有人經過佢身邊時，用手機應用程式盜取佢個人資料，又話呢方面嘅問題都係要請教專業人士喎。
另一場合上，「港版陀飛輪」萬希泉創辦人沈慧林及太太Rachel就話冇用payWave功能信用卡，但都好關注事件，因為佢哋都有用八達通自動增值功能。做金融業嘅Rachel話，依家科技發達，好難避免使用呢類產品，惟有用得小心啲。
卓妮