人有三衰六旺，一個城市亦有興衰起落。近年香港瓣瓣都唔掂，樣樣輸畀人，競爭力固然每況愈下，連「亞洲會展之都」嘅招牌都保唔住，咪就係時也命也囉。
係人都知，會展業一向係本港經濟主要動力之一，高峰期曾帶動超過四百億元消費開支，為本地生產總值貢獻唔少。可惜近年已經冇呢支歌仔唱咯。好似最近一個時尚飾物展咁吖，參展商多過參觀嘅人，參觀嘅人又多過購買嘅人，搞到有啲參展商食白果，有啲甚至提早收檔添。喺最近一項國際會展業排名中，澳門被評為區內表現最好，香港又輸一仗，你話係咪羞家吖。
點解香港會展業淪落到咁嘅地步？聽吓市民點講喇。「東方報業民意調查」顯示，大部分受訪者認為本港大型展覽場地不足，加上港府欠缺優惠政策，參展成本過高，冇晒競爭力。
冇錯嘞，本港大型展覽場地十年如一日，來來去去唔係會展就係亞洲博覽館，當局話就話計劃喺沙中線會展站上蓋興建新嘅展覽場地，最怕遠水難救近火，等得嚟蛇都死蚊都瞓喇。反觀周邊城市一日千里，廣州淨係一個琶洲展館咋，面積就遠遠大過香港會展同亞洲博覽館嘅總和，簡直係蚊髀同牛髀。
仲有吖，好多地方為參展商提供各種優惠，務求吸引全球客商，唯獨香港好似皇帝女唔憂嫁咁，一味等運到，唔流失客源都幾難。難為港府仲開口埋口吸引高質素旅客，其實，參展商咪就係高質素旅客囉，家陣人哋寧願去澳門或者內地都唔肯來香港，港府又點樣吸引吖？正如上述民調顯示，多數受訪者認為買家減少來港採購，「亞洲會展之都」地位受到動搖。
正所謂，覆巢之下無完卵，會展業吹淡風，其實係整體經濟嘅一個縮影。大家有眼見，家陣各行各業經營困難，市面吉舖愈來愈多，連跨國名牌都紛紛棄租一線舖，小本生意更加冇運行，結業潮由地舖蔓延到樓上舖。好似銅鑼灣咁吖，一條短短五百米嘅街道，就有十多間樓上吉舖，都咪話唔淒涼。幾年前樓上舖之所以大受歡迎，皆因租金較平，可以壓低成本，薄利多銷，依家連樓上舖都做唔掂，可想而知環境幾咁惡劣。「東方報業民意調查」顯示，受訪市民擔心香港出現裁員潮，淪為執笠港，唔係杞人憂天■。
所以話，香港時運不濟，真係頭頭碰着黑。冇法子喇，港府管治無能，烏龍百出，加上社會愈來愈政治化，成日內鬥內耗，再咁落去，遲早玩死自己嘅咋！