有道是「手段不夠硬，身段就要軟」；若然政府夠強勢，身段豈會軟？眾官奶媽林鄭再不要「退一步海闊天空」啦，日前在立法會向泛民議員開炮，慷慨陳情，一句：官到無求膽自大，令我等蟻民見識何謂「狂來說劍」嘅俠肝義膽，林鄭你係得嘅！
人說「憤怒出詩人」，老朽要說「膽大出英雌」，林鄭呢位政務司司長，又再露出女殺手——好打得本色喇！官到無求，為何膽自大？其潛台詞即係話「阿姐視高官如浮雲，濕濕碎，放膽去，官到無求，至多唔撈！」
眾人奶媽路見不平，出口相助，自問係有情有義，「每憶上方誰請劍，空嗟高廟自藏弓」，林鄭呢位女英雌，的確係好打得！且仲好有義氣添，當年魯智深救下林沖時，對性格懦弱嘅林沖保證：「殺人須見血，救人須救徹。洒家放你不下，直送兄弟到滄州。」如今，林鄭不但官到無求膽生毛，自己唔怕被抹黑做醜人，也要為在鉛水風波受辱嘅官員討回公道：我有膽指出今次事件被政治化呢個現象，我有膽冒被批評護短嘅風險，為我盡心盡力嘅公務員討回公道！
老朽相信，林鄭見到運房局副局長邱誠武曾應示威者要求喝下來自啟晴邨嘅食水，佢嘅心——或許已在淌血，更令她痛心嘅，應該是在此關鍵時刻，為何擁有這麼勇猛名字嘅「誠武」，竟然不明白「士可殺不可辱」嘅道理。
林鄭話官員被迫飲鉛水——係不能接受嘅屈辱，佢哋要維護嘅唔單止係佢個人嘅尊嚴，也係特區政府嘅尊嚴！如此正氣凜然昭日月，真有魯迅「哀其不幸，怒其不爭」的情懷！
特區一眾高官，只林鄭一人懂得「官到無求」，不但膽大，且可更上層樓！如此沙膽英雌，你即使不在官場，官場依然有你的傳說；一人一票選特首時，老朽這票非你莫屬！