政情：兩副局長渡海泳「無約埋」
維港渡海泳自五年前復辦後，每年都有唔少立法會議員報名參賽，但好多人最後都甩底，去年仲爆出有議員差啲浸親嘅疑雲。今次渡海泳再冇議員報名，但係就有兩名副局長參賽，包括啱啱升職冇耐嘅政制及內地事務局副局長陳岳鵬（Ronald），以及曾經連立法會主席都噏唔出佢個名嘅商務及經濟發展局副局長梁敬國，唔通兩人都想借參賽博吓曝光？
首次參加渡海泳嘅梁敬國同我哋講，之前有同Ronald喺中大一齊練水，但並冇約埋去參賽，游游吓先喺終點前遇到對方。佢話自己喺泳池游一千五百米，最快紀錄係喺四十一分鐘內完成，但尋日就冇為自己計時。對於有泳手投訴今年海面多咗垃圾，佢自己就唔多覺，感覺游得好暢順，明年如無意外會繼續參加。
此外，之前已游過渡海泳嘅Ronald，就自言今次表現只係普普通通，事關已有一段時間冇練水喎。