中環出更：何君堯噏錯 嶺大變學院
早前喺嶺大「粗口歌」風波中要求解散學生會嘅律師會前會長何君堯，最近被特首委任為嶺大校董，引起學生不滿。何君堯尋日出席港台節目《城市論壇》時，一方面批評啲學生英文差，但自己又將早於九九年升格做大學嘅嶺大，多次講錯咗做「嶺南學院」，唔怪得啲學生質疑佢冇資格做嶺「大」校董喇！
何君堯喺論壇上回應點解提議解散學生會時，佢就以學生寫錯英文做例子，話如果學生將尋日日期由「November 18th」寫成「November 18st」，佢就會叫啲學生改番啱，寓意有錯就要改喎，認真無厘頭。不過，之後佢又最少兩次將「嶺南大學」叫咗做「嶺南學院」，真係有口話人冇口話自己。
出席同一論壇嘅中大學生會會長王澄烽，質疑何君堯對大學及高等教育界缺乏認識，無資格做校董。何君堯強調自己有做開慈善工作，喺中學、小學同幼稚園都工作過，對教育事業不遺餘力。之後佢仲豪言自己曾經係大學生，又係法律博士，點會冇資格做校董。王澄烽就反駁：「我都係大學生，咁我係咪等同了解高等教育？」
卓妮