中環出更：遊澳掃平帽 黃美斯獻禮
沙田馬場尋日舉行仁濟盃賽事，一眾仁濟醫院董事局成員帶埋親友入場玩。卓妮見仁濟前主席董吳玲玲及副主席黃美斯（Macy）都戴住設計別致嘅禮帽，細問之下，原來佢哋啱啱一齊去澳洲玩，今次主要行程係購買馬匹，但意外發現當地嘅禮帽又靚又平，兩人因而夾定齊齊戴帽入馬場，眾人見到都讚靚。董太仲爆料話，Macy大手掃入五大箱添！
豪購五大箱 自用兼送友
Macy解釋自己大手掃入五大箱禮帽之謎，佢話一來啲帽真係好平，一頂都只係幾百蚊，若喺香港買一頂起碼估計要三、五千蚊，真係平到笑，所以佢買咗十幾頂送畀朋友！咁又係，香港百物騰貴，加上澳幣、日圓等貨幣都大跌，變相令港人出埠旅行時好似購買力強咗，買嘢都疏爽啲喇！
講到最近多個國家貨幣貶值，仁濟總理兼Bannershop主席蔡寶健就牙痛咁聲，因為佢盤生意海外市場佔咗七成，損失都唔少。同場仲有仁濟副主席王賢訊嘅太太朱穎詩（Vincci）肚凸凸，原來佢已懷有第三胎，預產期喺明年春天，Vincci笑稱自己「五年抱三」，生完呢胎就可以收工！
另一方面，仁濟主席林煒珊亦招呼好多年輕人入場玩，仲同一班本月生日嘅仁濟人齊齊切蛋糕慶生日。仁濟前主席蘇陳偉香亦忙到滿場飛，佢三月卸任後即接任仁濟歷屆總理聯誼會執行委員會主席，首要任務係令停頓多年嘅聯誼會恢復運作，以延續仁濟人嘅情誼。
卓妮