鉛水風波玩卸膊 官到無品膽自大

話說立法會尋日辯論由泛民議員提出引入特權法調查鉛水風波嘅議案，結果喺建制派護航之下被否決。本來呢，呢個結果一啲都唔出奇，奇就奇在政務司司長林鄭月娥嘅一番「慷慨陳詞」，簡直令人嘆為觀止。佢批評有人將鉛水事件政治化，提出唔合理要求，又引用古人「人到無求品自高」嘅講法，聲稱「官到無求膽自大」，包括有膽承認制度不足，有膽冒被批評護短嘅風險，為盡心盡力嘅公務員討回公道喎。

冇錯，部分泛民政客藉鉛水風波抽水係事實，特別係區議會選舉臨近，政客為咗爭取選票，梗係咬住唔放喇。不過咁，蒼蠅不叮無縫的蛋，如果唔係港府施政無能，授人以柄，政客又邊有機會興風作浪吖。大家有眼見，鉛水風波爆發超過三個月，港府一直拖拖拉拉，敷衍塞責，淨係識搵承建商同水喉匠開刀，好似自己完全冇責任咁，係人都唔服喇。其實，鉛水危機之所以愈演愈烈，業界同承建商固然有不可推卸嘅責任，但當局放任自流，監管失職，一樣難辭其咎嘅咋。老實講，鉛水危害市民健康，搞到人心惶惶，立法會要求調查都好正常啫，係咪？

最離譜嘅係，無論係水務署專責小組抑或係房委會相關委員會發表嘅調查報告，都係高高舉起，輕輕放下，話就話批評水務署、房屋署等部門監管不力，但就完全冇要求官員負責，擺明敷衍民意，唔怪得畀人批評「五無」，即無真相、無跟進、無時間表、無問責、無懲處。

正所謂，公道自在人心，政黨民調顯示，超過四成受訪市民認為水務署及房屋署要為鉛水風波負最大責任，比率超過承建商以及持牌水喉匠，亦有逾半人不滿政府嘅處理手法。好明顯，港府官官相衞，一味玩卸責，難為林鄭仲好意思大大聲話冇發現有官員犯錯，簡直侮辱市民智慧。

所以話，港產官僚係就係夠膽大，弊在唔係膽大心細，而係膽大妄為。前政務司司長唐唐都識講啦，做男人要有膊頭，做公職要有腰骨，鉛水風波搞到滿城風雨，換轉係其他國家或地區，早就有官員下台喇。計功夫茶話齋，官到無求膽自大就冇嘞，官到無品膽自大就真！

始終都係嗰句，官僚靠得住，豬乸會上樹。政府無能，政客搞事，香港七國咁亂，連飲啖水都提心吊膽，大家除咗自求多福，仲可以點做呢！