政情：譚Sir創金句：十年怕草「蠅」
「樹根化」有蔓延趨勢！立法會議員鍾樹根屢次自創成語或詞語，代表作有「子烏虛有」、「明張目膽」、「雞毛鴨蒜」、「悔辱」等，成為金句被市民引用或網民惡搞對象。上周學聯率先被傳染，將「唇亡齒寒」寫為「唇寒齒亡」印喺宣傳品上，點知尋日輪到鍾樹根黨友譚耀宗（譚Sir）出事，創出「十年怕草『蠅』」，結果被其他議員恥笑！
慢必「幫口」 質疑睇錯稿
尋日立法會續會，辯論是否引用《立法會（權力及特權）條例》調查鉛水事件。譚Sir話目前已有三項調查工作進行中，故現階段毋須引用特權法呢把「尚方寶劍」。佢又批評泛民以橫額等形式抹黑，不但「抽水」，更加係「潑污水」！佢仲激動到話唔希望出現「一朝被蛇咬，十年怕草『蠅』（繩）」嘅情況。
「長毛」梁國雄一聽到就發現有問題，譚Sir亦受擾稍作停頓，惟仍未發現講錯，竟再次重複講一次。長毛等譚Sir完成發言後，就要求澄清到底係「蠅」定係「繩」，即蒼蠅定草繩？其後發言嘅「慢必」陳志全亦指出譚Sir可能「睇錯稿」，更即場解釋原句意思，譚Sir認真(火羅)爆！