政情：林鄭膽大 良心何在
立法會尋日復會，繼續辯論兩項由議員提出引用《立法會（權力及特權）條例》調查鉛水事件嘅動議，結果一如所料，兩項議案都喺建制派反對下被否決。但最意料之外嘅係，發言向來平淡如水嘅政務司司長林鄭月娥，突然喺總結時「大爆發」，怒斥泛民誇大鉛水事件及提出好多不合理嘅要求，又指議員要官員當眾飲鉛水係一種「屈辱」，自言「官到無求膽自大」，不怕公開同泛民開火喎。
其實鉛水醜聞確係因政府監管不力而引發，令大量基層公屋居民飲用多年鉛水而不自知，林鄭仲講啲咁刻薄嘅風涼話，難怪被議員寸佢「膽生毛但冇心肝」喇！
轟泛民將醜聞政治化
林鄭就鉛水醜聞公然護短，已經唔係第一次，佢早前出席立法會內務委員會特別會議時，僅承認政府對公屋食水含鉛問題「認知不足、制度不足」，但見不到有個別官員須為事件負責，已經惹來各方批評。到尋日嘅立法會特權法辯論，除多名「逢政府必反」嘅泛民議員，一直為政府「保駕護航」嘅多名建制派議員亦狠批政府喺鉛水醜聞中嘅表現。
其中廠商會代表林大輝指出，香港作為國際文明大都會，出現鉛水問題係「匪夷所思」，反映政府危機處理不足，管治能力出問題，而林鄭嘅「認知不足」論，更加係企圖蒙混過關、推卸責任，令高官問責制蕩然無存。就連建制派第一黨民建聯主席譚耀宗，亦批評政府對鉛水事件處理混亂。
不過，林鄭總結發言時不但無就政府監管承建商不力致歉，仲反過來炮轟議員。佢質疑鉛水問題已變得「泛政治化」，批評泛民誇大問題，動輒就話「飲毒水、中鉛毒」，提出全邨驗水、全民驗血等過分及不合理嘅要求。
指官員飲鉛水係屈辱
佢又提到曾有兩官員落區時被威逼飲鉛水，認為係屈辱，佢已於政府內部發指示禁止官員再次咁做，以維護個人及政府尊嚴喎。最後佢仲以「人到無求品自高」、「官到無求膽自大」來形容自己，聲言不怕因為反擊議員而被人批評。
林鄭言論一出，令社會各界議論紛紛，有網民更將電影劇照改圖惡搞，批評林鄭「你好大嘅官威呀！」而立會內，首先揭發鉛水事件嘅黃碧雲，就狠批林鄭言論具挑釁性，企圖轉移視線、卸責護短，強調如果要官員飲一、兩啖鉛水就係「屈辱」，咁成千上萬無故飲咗幾年鉛水嘅居民又點計數？黃形容林鄭今次不只係「膽大」，而係「膽生毛」及「冇心肝」。