中環出更：健身傷手 陳肇始冇買醫保
卓妮尋日喺立法會見到食物及衞生局副局長陳肇始（Sophia）嘅右手受傷要包紮住，似乎發生咗意外。原來佢仲要冇購買醫療保險，唔知佢係咪對現時嘅醫療保險冇信心呢？
失平衡跌倒 需治療六周
Sophia話一直有做開健身，但一兩周前，做舉上舉下動作時，唔小心失平衡跌倒，右手虎口位嘅舟骨骨裂，要用護腕固定右手，再作六個星期治療。佢話，以往都有教練看顧，但當日就冇，點知就受傷。
其後卓妮問Sophia有冇買保險，佢透露冇買醫保，又冇講要花幾多醫藥費。唔知佢係咪想等政府推出嘅醫保計劃，先會投以信心一票？話時話，Sophia隻手傷成咁，點解唔放假休養吓，反而要咁頻撲出席立法會會議呢？
卓妮