中環出更：港品牌專店登滬 望振聲威
市道差，更加要省靚招牌。成立一年幾嘅香港品牌總商會（總商會）早前舉行周年晚宴，會長趙振國報喜話，該會已成功申請政府嘅專項基金三百多萬元，用於發展品牌及拓銷內地市場，預計年底可以喺上海設立五千多呎嘅展示及交易中心。此外，總商會將於明年舉辦首屆「香港品牌大獎」，一於趁市道淡靜，省靚香港金漆招牌。
為期一年 攻內地市場
趙振國話，將喺上海設立嘅香港品牌專門店為期一年，既可讓會員展示自家品牌，亦可當作香港品牌喺內地尋找合作夥伴或代理分銷嘅重要平台。該會常務副會長王偉及副會長鄧乃蔚就話，港商應把握今次機會，大舉進攻內地市場。
講起首屆「香港品牌大獎」，總商會理事朱仲賢話，該獎項唔強調業界之間嘅競爭，而係按最具創意、最具社會責任及最具影響力等項目頒發獎項，冀藉此嘉許唔同行業嘅品牌，加深香港品牌喺中港及國際嘅形象及實力。
香港鐘表業總會前主席黃業光（John）及副主席徐珊雯（Elise）都有出席，身兼總商會副會長嘅John話，打造品牌每日都要做，無論係旺市定係淡市。佢做鐘錶品牌近三十年，希望可以分享省招牌嘅經驗。Elise就話，香港有好多唔同類別嘅品牌，若集齊開拓市場力量將大好多。最近以總商會名義開設嘅網上商店，有齊珠寶、鐘錶、玩具及生活時尚等唔同產品，推廣效果唔錯。
卓妮