中環出更：退休「智」識歎
香港人生活多姿多采，唔少城中名人都有秘書、司機等幫手接送或安排日常事務，有人連退休後都仍然要請私人秘書去打點每日行程。早前卓妮喺一個慈善晚宴上見到滙豐私人銀行亞洲區前行政總裁王以智（Monica），佢自爆依家嘅退休生活「冇秘書、冇工人、冇司機」，不過Monica當然唔係畀唔起，只係覺得唔需要！屋企冇工人，唔通Monica自己吸塵、洗碗？答案係Monica會請鐘點工人做清潔，出入就以的士代步。
雖然話退咗休，Monica仍然經常出席慈善派對。無論幾忙都好，跳舞始終係佢生命中最重要嘅事，Monica自爆依家一星期至少跳六天，每天跳兩小時，另加一小時運動，認真唔講得笑。
馬清揚考慮落場賽車
講番當日晚宴，其實係由知名嘅葡萄酒俱樂部The Wine Forum，聯同國際級酒櫃公司SENSIS合辦，其中The Wine Forum聯席創辦人Vidhi Tambiah及SENSIS總經理馮潔瑩（Agnes）一早到場招呼賓客。Agnes話當晚出席嘅嘉賓自帶靚酒參加拍賣，所得善款將捐助兒童醫健基金會，幫助內地農村嘅新生嬰兒。
東華三院總理馬清揚（Philip）、兒童醫健基金會聯合主席龍菁等人都有到場。對於香港明年將舉辦電動方程式賽事，熱愛賽車嘅Philip話係好開始，因為內地、澳門等鄰近城市都已有賽車，至於會否參賽，佢笑笑口話都會考慮喎！
卓妮