有人講過，喺美國唔識開車等於沒有腿，唔識英文等於沒有嘴，台灣作家柏楊加添一樣，廿一世紀，「不懂電腦等於沒有腦」。一啲都冇誇張o架，喺呢個科技年代，冇電腦等於冇頭腦，唔止寸步難行，而且隨時引發災禍添。
話說公立醫院電腦日前突然失驚無神跪低，所有醫院聯網都無法查閱病人病歷紀錄，影響多項臨床服務，包括X光服務、開藥及派藥等等，搞到醫護人員踢晒腳。好彩出事翌日係十一公眾假期，大部分政府門診休息，否則後果不堪設想。
點解會搞成咁？醫管局話喎，可能涉及兩項因素，包括人為疏忽及相關工作流程安排出問題。件事來龍去脈係咁嘅，醫管局計劃今年第四季為轄下公立醫院所有電腦系統進行軟件程式升級，點知資訊科技部人員擺咗個大烏龍，將仍處於試驗階段嘅程式發送到運作緊嘅電腦系統，加上工作流程有問題，令大量電腦跪低。醫管局指全港公立醫院共有一萬六千部電腦載有臨床管理系統，其中約二百部電腦證實受影響，需要即時修復。
堂堂醫管局處事咁兒戲，真係講都冇人信。正如有立法會議員話齋，醫院係治病救人嘅地方，電腦出錯後果可大可小，「電腦係死嘅，人係生嘅」，呢次事故擺明係人為疏忽。冇錯嘞，今次冇引起更大混亂，總算係不幸中嘅大幸，萬一影響救人或者搞出人命，都唔知點收科。醫管局例牌賊過興兵，要求資訊科技部兩周內提交調查報告，搵出犯錯原因及提出改善建議喎，其實係人都知，呢啲補鑊騷純粹為咗掩人耳目咋。
提起醫管局嘅資訊科技部，就巴閉咯，唔止架構龐大，擁有逾千名員工，而且資源充足，開發系統嘅開支動輒以億元計，其中資訊科技及醫療訊息主管今年仲獲選為「IT傑出人士」添。可惜吖，有人呢頭獲獎，嗰頭轄下部門就犯咁低級嘅錯誤，你話究竟係老貓燒鬚，定係浪得虛名呢？
所以話，上樑不正下樑歪。醫管局管理混亂，烏龍百出，搞到醫療事故無日無之，今次電腦跪低只不過係冰山一角咋。最好笑嘅係，港府實牙實齒要改革醫管局，早前仲發表咗一份檢討報告，點知到頭來又係換湯不換藥，淨係重整幾個醫院聯網，將資源調來調去，根本冇觸及管理問題，唔怪得被病人組織批評頭痛醫頭喇。
古人講得啱，凡大事皆起於小事。千祈唔好以為公立醫院電腦跪低係小事吖，如果醫管局唔吸取教訓，加強管理，堵塞漏洞，等到小事變成大事，咁就後悔莫及嘅喇。