區議會委任制下屆取消，屬於委任區議員嘅葵青區議會主席方平原本都打算轉戰直選，但近日又決定放棄參選，會將重心放回個人及社團工作上。至於同樣由委任區議員出身、後來轉戰直選進身議會嘅深水埗區議會主席郭振華，亦都決定放棄競逐連任，相信佢身兼回收基金諮詢委員會主席，日後可以投放更多時間到環保及減廢工作上。
回顧多年區議會工作，方平笑言區議會主席一職係燙手山芋，當年佢被委任後第一次開會即被踩場，事緣有議員提議於區議會上討論有關六四議題，方平諮詢過前輩的意見後，認為超出區議會職能加上沒有先例而拒絕有關要求，結果佢首次主持會議就遭泛民議員踩場，搞到要中途休會，令佢非常難忘。
至於郭振華則於九一年開始扎根在深水埗區議會工作，○七年轉戰直選，由委任變成民選議員。佢話當時第一次参選用的口號「同住又一村，盡心為坊鄰」，就正正係佢呢二十多年地區服務嘅工作及其在議會職務崗位上的總結，同時係佢新生活和挑戰的開始。