政情：酒莊請人 陳芳話要劈得
酒莊經營者係咪一定千杯不醉？怡園酒莊創辦人陳進強女兒、現任少莊主陳芳（Judy）就話酒量係鍛煉番嚟。Judy尋日出席香港總商會企業家分享會時話，當年隻身到山西管理酒莊，人生路不熟，期間仲發生不少笑話，又試過有應徵者考酒量時不合格，大醉於莊園門前「嘔白泡」，要送院治理。
Judy憶述，有次佢公司招聘銷售員，同事忽然神色慌張，話門口有個人「嘔白泡」，佢大驚下詢問，先知原來係應徵者過唔到第一回合面試，飲咗半支酒之後就醉倒。原來內地員工覺得，內地人飲酒應酬鍾意「劈」酒，如果賣酒嘅人酒量唔好，每次都要同事幫手頂酒或醉倒就大件事，所以先有呢個測試。不過，Judy就認為酒量可以鍛煉，嘔得幾次後，酒量自然會有所提升喎。
用八年同內地員工磨合
講番當年接管酒莊時，由於內地工作文化同香港好唔同，Judy足足用咗七至八年時間同當地員工磨合及溝通，亦試過有員工好努力為公司慳錢，點知出產第一支酒時，就將酒樽及招紙製作到好似豉油樽咁，影響銷量，後來要搵朋友幫忙先執番靚個酒樽外形。