中環出更：中大籌款晚宴 王以智飛身演出
香港大學副校長人選及校委會風波搞到滿城風雨，相反中文大學就繼續和諧，早前與和聲書院舉行「九五之尊、王者出力」籌款晚宴，卓妮見到不少城中名人都有出席，講起過去大學時代嘅快樂時光，大家都話非常懷念。大家樂主席陳裕光話，當年讀書醉心跳拉丁舞，又笑笑口話係當年男學生冧女絕技，所以好多同學仔一到聯校舞會就會嚟搵佢惡補舞藝。
問陳裕光有冇乘機向同學收學費，佢就話細個傻更更冇計呢啲數，最緊要一班朋友開心喎。
楊大偉難忘留學做DJ
同場仲有社企Green Monday創辦人楊大偉，佢話當年喺外國讀大學，最難忘喺當地兼職做華人電台嘅DJ，每星期都要諗題目同聽眾天南地北，練得一口字正腔圓嘅廣東話，至今仲有少少職業病，聽到人咬字唔清晰都會周身唔聚財。
講番個籌款晚宴，滙豐私人銀行亞洲區前行政總裁王以智當晚出心出力，大跳拉丁舞兼吊晒威吔表演。馬會副主席周永健、港大校務委員會主席梁智鴻、太子珠寶鐘錶主席鄧鉅明等亦有客串演出，獻唱經典英文名曲。
有份負責籌備及計劃當日活動嘅林李婉冰話，今年嘅經濟環境轉差，唔少校友都為生意煩惱，加上去年佔領行動後，好多過往出錢出力支持嘅朋友都質疑點解要再捐錢畀大學生，令佢哋籌款工作難上加難，但好在最後超額完成，多得校友同一班熱心教育嘅好友支持。
卓妮