正所謂，冇咁大個頭，唔好戴咁大頂帽。港產官僚吹水唔抹嘴，話要將西九文化區打造成媲美西班牙畢爾包、法國龐比度嘅世界級文化中心喎，結果多年過去西九仲係一塊爛地，加上資金不繼，隨時爛尾都有之。
大家有眼見，西九工程拖拖拉拉，莫講話完工遙遙無期，直情連起唔起得成都係未知之數，事關高鐵工程延誤影響交地時間，建築成本不斷上升，原本嘅二百多億元撥款只夠支付首兩期工程，第三期工程無以為繼。唔係話港府冇錢，只係以今時今日嘅政治環境，要求立法會同意追加撥款，諗都唔使諗，為咗填氹，港府需要諗辦法融資。
好嘞，諗咗咁耐，終於畀港府諗到「注地」呢條橋。所謂「注地」，其實係倣效港鐵營運模式，將西九文化區部分或全部住宅及商業地發展權，撥予西九文化管理局，再由管理局進行招標，夥拍私人發展商發展，條件係必須向政府補地價，並以發展利潤補貼營運及第三期部分設施嘅建築開支。
睇吓計劃係點吖。當局話喎，打算優先撥出藝術廣場發展區內三幅擬作辦公室及住宅發展嘅土地，可作餐飲、消閒、零售及商住用途，涉及總樓面面積六萬五千平方米，當中一萬二千多平方米屬住宅樓面。如果呢個如意算盤打得響，長遠可能會交出所有項目發展權畀管理局添。當局仲話只要有關方案準備穩妥，就會向立法會匯報喎。
即係咁，第三期工程係成個西九計劃嘅靈魂，如果冇咗大劇院等設施，同普通文娛中心冇乜分別，當局洗濕咗個頭，梗係要頂硬上喇。問題係，「注地」講就容易，實際一啲都唔易，西九當年之所以推倒重來，就係因為港府屬意單一發展商發展整個項目，即以文化包裝地產，引來官商勾結嘅質疑，結果政府不得不獨力承擔整個項目嘅開支，埋下今日超支嘅禍根。
家陣嘅「注地」方案換湯不換藥，隨時又引起明益地產商嘅質疑，社會爭議唔會小。再講吖，首兩期工程到依家仲無影無蹤，就算港府願意「注地」，到底有冇財團肯落疊都係未知數。所以話，港府左右做人難，都唔知點收科。
一句講晒，港產官僚無能唔緊要，好大喜功先至最攞命，明知香港係文化沙漠，偏要附庸風雅打造世界級文化中心，卒之咪搞到一鑊泡咯。淨係行政總裁咋，換完一個又一個，仲要個個都係洋人，唔通洋和尚真係會唸經咩？計功夫茶話齋，一不做二不休，與其將西九文化區搞到不倫不類，不如索性賣地發展住宅好過喇！