政情：八網難逃：阿Man 黃台仰 隻揪告吹互斥走數
凌晨三點，平常人應該熟睡家中，但偏偏忠義民團成員石房有（阿Man）同本土民主前線發言人黃台仰，就相約尋日呢個時間喺紅磡港鐵站大打一場，點知兩人嘅「挑機」會面不成，更各執一詞互指對方「走數」！
社交網貼相 各執一詞
尋日凌晨三時前，黃台仰同阿Man於個人社交網站實時發貼講及最新情況，其中黃台仰留言稱自己要「為民除害」，已出發到紅磡等候阿Man，更警告有走數前科嘅阿Man要應約；黃台仰其後上載於私家車嘅自拍照到社交網站，證明已到現場等候。
阿Man則報稱於凌晨兩點五十分已到現場，足足等咗四十分鐘仲上載手錶相片證明，又表示已搵到時間證人，又指斥有人只敢鏡頭前勇武。究竟阿Man同黃台仰邊個先係真正「走數」，呢個只有佢哋至知嘞！