政情：佔中混帳 戴耀廷「講唔到」
佔中發起人之一、港大法律學院副教授戴耀廷上月曾經講過，話交代整個佔中行動嘅收支帳目，其核數程序已到尾聲，希望最快本月公開報告。話雖如此，戴耀廷尋日出席活動被問及報告最新進度疑走數，至少兩次話唔清楚，推說會計師需時整理及睇埋啲單據。
當問及係咪可以本月內「交數」，戴更三次話「講唔到」。話時話，佔中一周年都過埋，戴對公開收支帳目狀似十問九唔知，繼續拖得就拖，唔通以為側側膊就可以唔多覺，令佔中總捐款額等外界關心嘅問題，永遠都無答案？
朱耀明紗布蓋左眼
講番今次戴公開現身，其實另外兩名佔中發起人陳健民同朱耀明亦有齊齊露面，其中朱嘅左眼被發現用紗布包住，唔知係咪最近又做咗眼部手術呢？