政情：警隊fb開頁 許Sir擔正
「四點鐘許Sir」重出江湖，大家放心唔係佔領行動再次出現，今次係警方為咗加強來自不同社群嘅市民溝通，尋日正式推出「香港警隊」facebook專頁，搵咗人稱「許Sir」嘅警察公共關係科總警司許鎮德拍攝宣傳短片，而許sir於短片中仲有一個新拍檔，就是以佢嘜頭整成嘅3D立體公仔。
許Sir於去年佔領行動期間，以一句「recap in english」金句一炮而紅，據聞許sir於警隊fb專頁就有自己私家節目「四點鐘新聞台」，專講時事和警隊資訊。
許Sir喺最新段宣傳短片中仲小試牛刀講一句，「或者讓我再重申一次」，不過呢句就係金句嘅中文版，而非英文版。
警隊fb備受各界關注，自尋日下午面世起，短短半日已有超過一萬三千人like咗。雖然好多人畀like，但都有網民留言批評警隊工作。警察公共關係科高級警司關翠貞話，自己未必有時間回覆所有留言，但尊重巿民發言權利，如果有不適當留言先會刪除。