政情：張國柱聞內副 耍手擰頭
立法會最後一個會期即將開始，惟立法會內務委員會副主席（內副）人選至今仍然未有共識，早前有傳泛民代表同建制派提及，內副只可以係民主黨單仲偕（(先刂)雞）或公民黨梁家傑（袋巾傑）二揀一，據知唔少建制派都對呢兩個人選有意見而變相彈票。最新發展竟然有人提名社福界議員張國柱「升呢」，仲話一旦佢做內副一定會「開綠燈」。不過身為當事人嘅張國柱對「被提名」感到好驚奇，表明唔會做內副，似乎又一次係「神女有心，襄王無夢」嘅局面。
建制派尋日早上開會討論最後一個會期，各委員會正、副主席安排，晚上同特首梁振英於禮賓府飯局，據知建制派早上開會時已經決定唔會擸盡所有委員會正、副主席，仲表明有啲位唔會同泛民爭。對於內副由誰人出任，建制派屬意衞生服務界議員李國麟出任，惟泛民則希望係(先刂)雞或袋巾傑二揀一。民建聯前主席譚耀宗會後透露，建制派仍未決定由邊位泛民議員出任，原因係唔少建制派對單梁二人持有唔同意見，希望搵到一個多啲人同意嘅人選先再考慮，否則可能改由建制派派人出戰。
張自言經驗不足
綜合多方消息指，雖然早前有傳建制派願意接受(先刂)雞出任內副，惟仍有部分人覺得對方太激，反指倘若由李國麟或張國柱出任就無問題。另外有人再次為建制派揀內副如此挑剔解畫，表明最顧慮就係有人做內副後故意漏料，如果係咁好難同政府傾得深入。
對於突然被建制派建議做內副，張國柱接受查詢時話無聽過呢個消息，又表明唔會做內副，原因係經驗不足，加上已到最後一個會期，自己希望一心做好福利事務工作，留番多啲時間畀身體休息。
波哥獲撐掌財會
相反被視為燙手山芋嘅財務委員會主席一職人選揭盅，保險界議員陳健波（波哥）一如所料獲支持出任，據知波哥已開始拉票，包括親自向每位議員送上拉票信，又計劃去前稱「飯盒會」嘅泛民會議推銷。但財委會副主席人選就有多種聲音，有批建制派希望由陳鑑林擔任，自由黨則希望由泛民代表出任。
至於去年被泛民突襲嘅工務同人事編制委員會主席位置，據聞建制派已有腹稿，前者屬意由工程界議員盧偉國出任，後者則由體文界議員馬逢國出任，到時睇吓會否一如所願嘞！