中環出更：下屬要求延遲升職成「佳」話
要管理好一間公司，好考管理層嘅管治哲學，中港照相器材集團主席孫大倫（Dennis）早前出席活動時大談管理心得，笑言公司嘅事務基本上已經交晒畀兩個仔處理，依家自己好少再管理公司，反而着重管理自己。香港總商會主席彭耀佳（YK）則透露，試過遇到有同事要求延遲升職嘅個案！
孫大倫學呼吸強身健體
香港管理專業協會早前舉行「最佳管理培訓及發展獎」頒獎禮及晚宴，多名嘉賓紛紛分享管理心得，其中Dennis話年紀大咗，發現照顧好自己身體健康先係最重要，近日佢就練緊類似氣功嘅呼吸運動。佢話早前花咗八日學習一套呼吸方式，只要坐喺度半小時就已經會成身出晒汗，現時佢早晚各練習一次，感覺肩頸痠痛的情況減輕咗。
講番管理一間公司嘅經驗，YK話新一代員工追求工作生活平衡，有時亦會兼顧多方面問題，試過有一次，佢想將一位女同事升職，不過該位女同事私下向佢請求暫時唔升住，事關佢男朋友亦係公司一分子，但升職比佢慢，為咗顧及對方面子就提出咗呢個請求。
YK思前想後，認為該名女同事工作能力的確較高，強行升佢職可能令佢哋感情有變而離開公司，反正延遲升職時間並無不可，因此答應咗該名女同事嘅要求。
蘇澤光係喇沙風頭躉
同場仲有香港機場管理局主席蘇澤光及大家樂主席陳裕光，原來二人係喇沙師兄弟，陳裕光其後爆料，當年蘇澤光喺學校係風頭躉之一，唔止係風紀隊長，仲於台上為同學成功向校長爭取於畢業禮典後放一日假，成為同學間嘅偶像。蘇澤光則憶述當年讀書揀咗工商管理，好開心見到好多靚女同學，點知後來先發現女同學個個都係心儀醫科男生，笑言令佢感到好失望。
卓妮