中環出更：劉業強太太 盼女代圓律師夢
唔少人細個做唔到嘅事，都會寄望啲仔女幫佢哋達成夢想。鄉議局主席劉業強（Kenneth）嘅太太劉葉愛愛都唔例外，佢個大女今年已經十六歲，依家喺英國讀書，差唔多要諗吓大學讀咩專業。佢透露囡囡暫時仲未問佢意見，但如果問到時，佢就一定會建議囡囡讀法律。
大爆仔女冇咁黐爸爸
劉太解釋，自己細個都好想讀法律做律師，但最後機緣巧合走咗去讀金融，所以如果囡囡問到佢，就會建議對方試下讀法律，但最後決定權都喺個女度。
問佢囡囡依家拍拖未？劉太就話未有，並強調佢同仔女關係好親密，如果有嘅話佢一定知道，又大爆Kenneth同啲仔女嘅關係冇佢咁親密。至於囡囡嘅擇偶條件，佢就話梗係要錫個囡同顧家喇！一切都以個女為先，真係廿四孝媽媽。
卓妮