西方傳說有個綠林英雄羅賓漢，武藝高超，膽識過人，經常劫富濟貧，成為正義嘅化身。可惜喺現實當中，劫富濟貧就冇嘞，劫貧濟富就經常可以見到，好似國泰航空公司咁吖，發財唔立品不特止，而且嫌貧愛富添。
係咁嘅，國泰日前宣布改變旗下「馬可孛羅會」嘅續會安排，由現時計算飛行里數或航段，變成計算積分。呢項變動本來無可厚非，弊就弊在計算方法明顯「優待富人，歧視平民」，選搭商務或以上等級機位嘅會員未來就算乘搭次數減少，亦可以輕鬆續會，反而經濟客位就要比現時多搭至少一半次數至可以續會，擺明大細超喇。仲有吖，國泰除咗大幅調高選搭經濟客位嘅續會門檻，綠卡會籍收費亦大幅上調，由現時五十美元加到一百美元。
有立法會議員質疑，國泰嘅做法明顯傾向富人，造成級別歧視，予人劫貧濟富嘅感覺。冇錯嘞，搭飛機唔同搭巴士，經濟客位要搭多一半次數以上至可以續會，即係強人所難啫。「馬可孛羅會」嘅服務本來已經備受詬病，尤其係熱線電話好難打通更頻遭投訴，家陣再咁樣搞法，想唔趕客都幾難。難為國泰仲形容今次改變係邁向新里程，其實係邁向趕客新里程至啱。
冇法子喇，國泰一向唯利是圖，當乘客係羊牯，今次續會安排劫貧濟富，一啲都唔出奇。近年航空公司超賣機票問題不斷惡化，作為本地龍頭嘅國泰更加有恃無恐，導致投訴多多，怨聲載道。呢，有乘客由商務位降級至經濟位，有乘客被當人球踢來踢去，有乘客就被迫等候下一班機，無奇不有，七國咁亂。唔怪得有人話，今時今日搭國泰，好似玩俄羅斯輪盤，運氣差啲都會被「懲罰」。國泰店大欺客，對乘客唔講道義，對會員又點會客氣吖！
最令人反感嘅係，國泰見錢開眼，而服務質素就每況愈下。由於內部管理混亂，國泰航班延誤成為家常便飯，最慘係時不時上演九霄驚魂，令人不寒而慄。日前之嘛，國泰一班由澳洲開恩茲飛本港嘅客機，其中一個液壓系統出事，航機足足遲飛十七小時，但國泰並冇安排受影響旅客入住酒店，只賠償一百美元了事，搞到二百幾名乘客齊齊瞓機場。當然喇，瞓機場仲係小事，國泰近年好似撞邪咁，唔係呢度故障，就係嗰度出事，沒有最恐怖，只有更恐怖，乘客只能自求多福。
正如古人話齋，「機關算盡太聰明，反誤了卿卿性命。」國泰一味算死草，連續會安排都勢利過人，因住被港人唾棄，聰明反被聰明誤吖！