政情：今日你上鏡：「琪」想設計 外套中西合璧
做生意最緊要創新，已有六十二年歷史嘅度身訂造男裝品牌詩閣（Ascot Chang）亦唔例外。早幾日我哋見到詩閣董事總經理張德祥及姪仔張宗琪（Tony），Tony透露正設計一款兩面皆可穿着嘅外套，一面係中山裝，另一面就係西裝。一件外套點樣做到中西合璧？Tony笑笑口話要賣吓關子喎！
除咗搞創意設計，Tony最近亦忙於下星期喺上海搞嘅大型推廣活動。佢話，詩閣進軍內地已經廿幾年，但從未喺內地舉行大型活動，希望可以藉今次打響香港品牌形象。今次仲特登搵星級名人設計慈善袖口鈕，屆時籌得嘅善款將捐畀慈善機構。