香港大學校委會日前否決港大法律學院前院長陳文敏出任港大副校長，連日來風波未能平息。港大校委之一盧寵茂嘅港大電郵信箱尋日一早收到大量「問候」信，夾雜「Ｘ你老母Ｘ家鏟」等粗口，佢認為同佢作為校委嘅身分有關。此外，港大校長馬斐森對事件態度同言論亦日日變、日日新，似足變臉大師。
上月廿九日校委會作出決定後，馬斐森表示對結果感到失望，但稱會尊重校委會決定，只因校委對港大最佳利益有不同定義。惟事隔一日，有外媒披露馬斐森指自己及支持陳文敏嘅校委飽受施壓，更稱不排除北京於背後介入副校遴選，言論令人譁然。
馬斐森可能有感前日言論太「惹火」，尋日不再回應，只表示每名校委都有自己理由，以大學利益為依歸而作出決定。佢又突然狠批港大學生會會長馮敬恩破壞保密原則，大爆校委閉門發言內容，認為校委會討論內容應保密，同校委會主席梁智鴻同一陣線。馬斐森言論翻來覆去，唔知係咪又有人干預佢呢？