政情：「健」康會計師 備戰長跑賽
健康生活近年大行其道，啱啱上任嘅特許公認會計師公會香港分會會長李健（Arthur），就係為健康而堅持做運動嘅人辦，仲因此狂減三十磅添！現時佢正努力備戰月中舉行嘅馬拉松，拍住視障人士齊齊做運動。
咪睇Arthur望落好瘦削，其實兩年前佢體重有成一百六十磅咁多，仲有一個雙下巴，直到發現有胃酸倒流問題，先至調整飲食及生活習慣，唔食甜嘢、戒酒戒汽水，仲開始行路當運動。
夥拍視障人士參加
會計師最叻計數，Arthur計一計條數發現，若只係行路要成個鐘先消耗到二、三百卡路里，於是開始踩單車及跑步。本月中旬佢會夥拍視障人士一齊跑馬拉松。佢話，同佢一齊跑嘅視障人士非常專業，練跑時跑得仲快過佢，仲話唔使刻意遷就佢喎。