政情：葉國謙罰做三失老人
今年六月政改方案一役，建制派因為要「等埋發叔」而甩轆離場，令政改方案喺八票贊成、二十八票反對之下被否決，留下咗歷史印記。帶頭拉隊離場嘅立法會議員葉國謙（阿謙），同埋堅持等埋發叔嘅林健鋒就被質疑責任最大，特別係公認係「建制派班長」嘅阿謙，事後被建制派批評指揮混亂，內訌一度白熱化。
政界一直揣測難辭其咎嘅阿謙將會受罰，甚至面臨「三失」局面。果然事發三個幾月，佢所屬嘅民建聯（民記）尋日公布嘅區議會選舉名單中，就未見阿謙身影，睇嚟阿謙真係扭耳仔認錯都冇用。
政改甩轆鬧出笑話，之後更引爆建制派WhatsApp對話洩密風波，外界都將矛頭直指作為建制派班長嘅阿謙。雖然阿謙事後公開致歉，又公開承認自己要承擔不可推卸嘅責任，不過若想因此避過受罰，就真係異想天開喇！
失職早有前科
事關阿謙嘅甩轆又點止政改方案一役，好似去年佔領運動期間，泛民突襲立法會財務委員會轄下嘅工務同人事編制兩個小組委員會，取得兩個小委員會控制權，建制派其後補飛加入，就畀泛民玩餐飽。大家都已經覺得係阿謙太掉以輕心，畀泛民有機會得逞，所以話建制派對阿謙早已有微言。
尋日民記公布嘅區議會選舉名單冇阿謙，即係話阿謙唔會再出選中西區區議會觀龍選區，結束佢二十年區議員生涯。同時亦意味阿謙失去循區議會第一功能界別躋身立法會嘅資格。如果阿謙明年唔會轉地區直選出戰立法會選舉嘅話，佢就會同時失去區議會同立法會嘅議席，「班長」一職亦自然要拱手讓人，淪為「三失」老人。
嫻姐將退火線
除咗阿謙，亦有傳立法會超級議員陳婉嫻（嫻姐）唔會再參選嚟緊嘅區議會。同佢同屬工聯會嘅立法會議員黃國健承認，該會前日通過咗區議會參選名單，當中並冇嫻姐個名，亦即嫻姐唔選區議會之餘，亦唔能夠以區議會第二功能界別嘅途徑參選明年嘅立法會。而該會立法會議員王國興今日就會報名出戰區議會選舉小西灣選區，頂替喺該區擔任區議員廿年嘅陳靄群，似乎亦都為接替嫻姐埋下伏線。