中環出更：同場相遇 鬍鬚曾當貪曾透明
「貪曾」前特首曾蔭權爵士因貪腐醜聞被廉政公署查足三年零八個月。律政司早前話已將最後法律意見交畀廉署，換言之貪曾隨時「落鑊」。唔知係咪想享受埋最後嘅自由，貪曾近日頻頻現身，尋日出席喺灣仔金紫荊廣場同會展舉行嘅十．一升旗禮同酒會。雖然貪曾唔知醜，周圍打招呼，但同佢曾經難兄難弟嘅財政司司長曾俊華（鬍鬚曾）就冇睬佢，即使酒會上要碰杯，鬍鬚曾都碰完即閃。唔通鬍鬚曾都覺得對於隨時落鑊嘅貪曾，都係快閃為妙？
貪曾一現身就周圍打招呼，又撩政務司司長林鄭月娥講嘢，林鄭只係點頭，似乎唔想理佢。而隔幾個身位嘅鬍鬚曾就只同立法會主席曾鈺成傾偈，全程用背脊得住貪曾。
袁國強冇去十．一活動
貪曾同鬍鬚曾可謂難兄難弟，有指兩人識於哈佛大學深造時。貪曾做特首後，○六年委任原擔任工商及科技局局長嘅鬍鬚曾出任其特首辦主任，○七年連任後更畀鬍鬚曾升任財政司司長。不過呢啲都已係往事，人走茶涼，更何況貪曾已聲名狼藉。
另外，律政司司長袁國強尋日未有現身升旗禮同酒會，唔通有份處理貪曾案嘅佢，怕撞口撞面會尷尬？律政司發言人就話袁國強係因為身體不適先至缺席喎。
卓妮