中環出更：術後踏三輪車 IQ博士風騷
尋日灣仔會展舉行十‧一酒會，好多政商界名人蒲頭，包括被傳因病休假半年嘅民政事務總署署長陳甘美華，仲有做完肺癌手術嘅前立法會議員黃宜弘（IQ博士）。卓妮見IQ博士騎着一架電動三輪車到場，成個老頑童咁款，吸引好多人嘅注目，馬會大董梁高美懿見到都忍唔住上前打量一番。
IQ博士身穿全白色西裝，騎着三輪車穿梭會場，非常風騷，佢太太梁鳳儀（Anita）就陪伴在側。IQ博士話，佢做完手術後身體恢復得好好，但經常唔夠氣，所以用呢架車代步。
Anita就話，部車係喺美國行醫嘅細仔黃群恩送畀IQ博士，呢款車喺外國好普遍，可以駛至機場登機閘口，夠晒方便，所以IQ博士好鍾意，經常帶住周圍去。好多朋友見佢好似小朋友踏單車咁，都大讚好得意。兒子咁有孝心，難怪IQ博士對架車愛不釋手喇！
陳甘美華久休後身體「OK」
由今年二月初開始放足半年假嘅陳甘美華就明顯清減咗，有傳佢因病而無法返工，外界都好關注佢近況，卓妮趁機問佢係咪因病休假，佢冇正面回應，至於身體如何，佢就答OK，其後急急腳離場。
同場嘅立法會議員盧偉國就話自己都有問候陳甘美華健康狀況，佢一樣答覆OK，至於係咪病咗，佢就話涉及私隱不便評論。
香港軟件行業會會長楊全盛（Eric）就喺酒會上巧遇恩師中文大學工程學院副院長黃錦輝，Eric笑稱當年最鍾意上黃錦輝嘅通識堂，因為佢把握上堂時間瞓覺，仲瞓得好舒服添。
卓妮