政情：財會修規惡啃 吳亮星推「波」
近年議會內拉布風氣盛行，負責審查及批准政府提交公共開支建議嘅財務委員會更成為眾矢之的，主席一職因此成為燙手山芋。本來建制派協調咗金融界議員吳亮星（星爺）及飲食界議員張宇人梅花間竹咁做兩年，但兩人都先後表明今屆會期唔做財會主席。
張宇人亦未撥亂反正
星爺尋日講起呢件事時爆料話，曾經同張宇人反映要將《議事規則》三十七（a）撥亂反正，以免泛民議員繼續錯誤使用呢條議事規則進行「拉布」。可惜直至上個會期，部分議員仍然不斷喺財會上重複問問題。咁係咪張宇人辦事不力？星爺就話唔評論。
星爺話，既然張宇人無解決呢個問題，佢惟有寄望勢接任財會主席嘅保險界議員陳健波撥亂反正咁話。但講到要修改呢條規定，實會觸動泛民嘅神經，加上有排山倒海嘅議事規則排緊隊修改，有排都未輪到三十七（a）。換言之陳健波未必可以完成呢個任務。星爺將咁艱巨嘅任務交畀陳健波，認真靠害！