中環出更：陳岳鵬「第一次」唔剃鬚扮老成

啱啱升官做政制及內地事務局副局長嘅陳岳鵬（Ronald），尋日首次以副局長身份到立法會出席政制事務委員會會議。年僅三十三歲嘅Ronald被批評太年輕及工作經驗不足，尋日佢明顯刻意打扮，不但着上成套西裝，更配襯粉紅色領呔，加上甚有個人特色嘅滿臉鬚根，明顯係扮老成喇！

一向有留鬚嘅Ronald自爆，佢曾問過同事剃晒啲鬚好唔好，但同事都話睇慣佢留鬚個樣，所以Ronald最終都係維持原狀。被問到尋日表現值幾多分，佢笑言第一次唔會做足一百分，因為要為自己留吓改善空間喎！

有份出席會議嘅立法會議員蔣麗芸（Ann）就「投訴」話，Ronald講嘢聲量太細，可能唔識用咪，對唔正。至於阿Ann對Ronald表現畀幾多分呢？阿Ann好唔客氣話，如果十粒星為滿分，佢會畀五粒星，即僅僅合格。

雖然阿Ann諸多批評，但係佢又體諒話，Ronald新官上任，表現難免戰戰兢兢，以後佢多啲到立法會同議員對話，情況必有改善喎！

卓妮