西方諺語有云，羅馬唔係一日建成。羅馬帝國工程再浩大，總有建成嘅一日，奇怪嘅係，豆腐膶咁大嘅香港，基建工程拖拖拉拉，搞到無一不延誤，無一不超支，淪為一個個財政黑洞，問你怕未。
呢嗱，香港機場第三跑道仲未動工，建造成本已經由最初估計嘅一千三百幾億元，增至一千四百一十五億元，最後埋單計數，唔知仲要超支幾多添。
正所謂，有錢並非萬能，無錢萬萬不能。由於三跑建造成本巨大，當局為咗繞過立法會，決定由機管局自行融資，包括動用內部資金、舉債及向離境旅客收取機場建設費。
即係咁，收取機場建設費係國際通用做法，本來無可厚非，問題係，當局開頭建議每位旅客收取一百八十元，引起廣泛質疑，當局惟有退一步，決定調低有關徵費，根據長、短途設定唔同收費，短途乘客收九十元，長途乘客收一百六十元，商務及頭等乘客收一百六十至一百八十元不等。機管局估計，新收費建議同原有融資方案比較，淨收入減少約一百六十億元，因此需要從市場額外借貸，彌補資金短缺差額。
老實講，香港作為國際都會，為咗增強競爭力，興建三跑係無可厚非嘅，環顧周邊城市，好多機場已經有第三甚至第四條跑道喇，香港更加唔可以例外。依家嘅問題係，三跑工程非同小可，工程費唔止超英趕美，直情係世界最昂貴跑道之一，令人懷疑係咪物有所值。
工程費用昂貴都算啦，近年本港所有基建都阻力重重，多災多難，無論係高鐵，定係港珠澳大橋，統統嚴重延誤及超支，搞到「蝕盡海陸空」。淨係港珠澳大橋咋，一場司法覆核就導致超支六十幾億元，近日仲爆出香港口岸人工島飄移嘅醜聞，究竟幾時至可以完工，只能望天打卦。所以話，三跑工程可唔可以順利展開，冇人敢寫包單。
唔係杞人憂天o架，早前已經有人針對三跑嘅環評報告提出司法覆核，呢單官司唔知要拖到幾時，一個唔好彩，隨時重蹈港珠澳大橋覆轍，咁就大鑊喇。不可不知，香港物流業正走下坡，競爭力每況愈下，等到三跑姍姍來遲建成，到時可能已經成為明日黃花，得物無所用咯。正如有人質疑，花費咁多錢興建新跑道，唔止冇符合成本效益，隨時淪為大白象添。
所以話，以史為鑑，可知興替。歷史學家吉朋寫過《羅馬帝國衰亡史》，細說呢個盛極一時嘅帝國點解會玩完，如果港產官僚唔識吸取教訓，繼續蹉跎歲月，到時睇怕要寫多本《百年香江衰亡史》都得咯！