中港矛盾惡化，原因之一係香港人嫌內地人不文明，車廂食嘢、隨地吐痰、垃圾亂扔乜都齊。查實呢啲係五十步笑百步嘅咋，只要睇睇每年中秋節過後，全港各區賞月熱門地點例牌變垃圾崗，足以證明香港人嘅公德心，同內地人有得揮。
口講無憑，本報記者喺中秋夜去過多個公園睇過，真係大開眼界咯。就以將軍澳海濱公園為例啦，周地玻璃樽、月餅罐同埋燒毀嘅燈籠，蠟燭痕迹有如斑斑血漬無處不在，好似打完仗咁款，睇見都心寒，市民喺垃圾堆中賞月，乜嘢閒情雅致都冇晒啦！
反觀屯門海濱花園就有新意嘞，除咗垃圾，今個中秋夜忽然多咗兩棵「許願樹」，唔係講笑，呢兩棵仲壯觀過大埔林村許願樹。原來近年唔少市民鍾意將螢光棒掛喺樹上，有人甚至當螢光棒係許願寶牒，亂咁掟上樹。試諗吓，中秋佳節明月當空，幾十條螢光棒樹上高高掛，的而且確係幾靚嘅。
之不過，呢兩棵發光「許願樹」雖然靚，但螢光棒掛喺樹上好難清理，手尾極長，因為經過長期日曬雨淋，螢光棒有可能釋出有毒化學物質，唔單止危害樹木本身，市民吸入隨時影響健康。再加上螢光劑滲漏物會污染環境，塑膠又難以分解，為咗一時之快而影響地球生態，你話值唔值得吖。
亂丟垃圾破壞環境當然抵鬧，不過講到最缺德嘅，莫過於煲蠟囉。每逢中秋前夕，當局例必呼籲市民唔好喺康文署轄下場地煲蠟或放孔明燈。最弊係「言者諄諄，聽者藐藐」，你有你講，佢有佢公然煲蠟助興。
呢，喺將軍澳海濱公園一條木橋中央，就有一個大窿，懷疑係因為煲蠟燒穿嘅嘞。話口未完，今年又有市民因為被高溫熔蠟燒傷或燙傷入急症室求診，雖然傷勢唔重，但歡度佳節變樂極生悲，咁又有乜謂呢？
講到底，垃圾蟲搞到周圍污糟邋遢，當局係責無旁貸，港產官僚明知每年有大批市民外出歡度中秋，劑劑收集到數以十噸計嘅垃圾（口架）啦，因乜解究仍然後知後覺，無及早加強宣傳教育呢？正所謂「治亂世用重典」，「治亂拋垃圾」當然亦要用重典啦，其實只要喺大時大節加派人手巡邏，見有任何垃圾蟲，即時就地正法票控，等佢哋唔好心存僥倖，自然收到阻嚇作用啦！
計功夫茶話齋，當局再縱容垃圾蟲橫行，香港人下年中秋賞月，睇怕要吟句「明月幾時有，垃圾問青天」咯。