雖然農曆七月「鬼節」已過，發展局局長陳茂波（波叔）尋日行山都撞「鬼」，不過此「鬼」其實係宣傳惜食運動、減少浪費嘅「大嘥鬼」。話說環境局局長黃錦星（星星）尋日帶同「大嘥鬼」去大東山行山，鼓勵行山人士喺行山後將自己嘅垃圾帶走，以保持環境清潔。星星除咗同行山人士一齊開餐，仲落手落腳執垃圾，據知山上最多嘅係廁紙同蕉皮，而事有湊巧，星星（左）於行山期間撞到波叔（右），兩人聯同「大嘥鬼」一齊合照，究竟係咁啱撞到，定約埋一齊行山，真係只有佢哋兩個至知喇。
