政情：中環出更：「煇」灑汗水 特訓備戰單車節
最近有一齣電影以踩單車為主題，掀起新一輪踩單車熱，原來新鴻基地產執行董事郭基煇亦踩單車踩到上晒癮，起碼一個禮拜練三次，於三、四個月前更正式跟教練學嘢，備戰下月舉行嘅單車節，連教練都大讚其狀態同運動員有得比；今年三月結束運動員生涯嘅「鐵血女車神」黃蘊瑤則希望，單車運動可以由比賽層面擴展到社區。
旅遊發展局同新鴻基地產合辦首屆「新鴻基地產香港單車節」，下月十同十一日於尖沙咀區舉行，據知大會邀請咗一百五十個基層家庭參與，而新地主席兼董事總經理郭炳聯、執行董事郭基煇兩叔姪都身體力行支持，分別參加「總裁慈善單車遊」同「三十五公里挑戰組」。
成果拍得住運動員
卓妮尋日趁中秋節追月日，直擊郭基煇等人嘅練習情況，現場所見郭基煇戴住頭盔、全套運動衫、踩住部幾萬元嘅「戰車」，一副專業單車運動員look。自認貪靚嘅郭基煇笑言，一身打扮鮮艷到似燈籠，好應節，又話三、四個月前先正式跟教練學嘢，每次都喺東涌、科學園一帶踩足幾個鐘。
郭基煇又話從踩單車中領悟到四個大道理，第一，踩單車老少咸宜、無分貧富，無論幾十蚊租單車定幾萬蚊買架單車都可享受當中樂趣；第二，由依賴父母到自己學識踩單車嘅過程，雖然期間會不斷跌倒，但亦會有所成長；第三，單車比賽係群體非個人活動，一個車群並肩作戰減低風阻、守望相助；第四，踩單車可以幫自己訂下目標，勇往直前，應對公司同個人逆境。
前港隊單車代表隊成員兼教練梁志賢大讚郭基煇勤力，由最初時速廿五公里進步到依家四十公里，屬於運動員平均時速。浸會大學體育學系副教授雷雄德則話，港人身體質素普遍幾差，希望今次活動令港人多啲運動喎。
