政情：學聯五子不堪回首
去年持續七十九日嘅佔領行動，有份領導整個行動嘅專上學生聯會（學聯）被批進退失據，及至於佔領行動後則深受「退聯潮」困擾，因而元氣大傷，而適逢尋日係佔領行動一周年，去年十月曾同政府高官對話、時任學聯秘書長周永康等學聯五子罕有地齊齊接受傳媒訪問，言談間終於「認衰」，有人自爆早於去年十月初佔領高峰期已知手上「無牌可出」，有人承認「好傷」不斷自我怪責同自我否定，有人更表明唔想詳細回看當時發生嘅每一件事，似乎學聯五子未能「命運自主」，事隔一年仍然繼續迷惘。
岑敖暉早知冇牌可出
學聯五子去年九二八佔領行動開始後，幾乎每晚企喺金鐘大台「開咪」，於去年十月下旬曾與政府高官就政改對話，又一度推動議員辭職公投、圍堵政府總部等行動，直至去年十二月中被清場，似乎每個階段都「有牌」在手。不過，學聯前副秘書長岑敖暉喺訪問中爆料，早喺十月初、即佔領高峰期已感到「唔對路」，「手頭上嘅牌得番所謂嘅號召力，但嗰啲號召力其實唔係號召到好多嘢」。佢自言，罷工、罷市當然最具殺傷力，但其他唔同程度嘅不合作運動，根本無辦法喺社會各階層展開。
學聯喺佔領期間多次被批評進退失據，學聯前常委梁麗幗於訪問中公開承認「做錯過好多決定」，但同時死撐唔後悔就得，坦言知悉身邊好多人受傷，同付出咗好多，諗番轉頭呢啲就係最大代價。學聯前常務秘書鍾耀華則透露，當每個記者問及運動決定幾時啱、幾時錯，同埋邊個負責時，令到好多人都唔夠膽講自己嘅故事，形容呢個係一種鬱結。
周永康不斷自責無能
不過，講到最迷失自我嘅可能就係學聯前任秘書長周永康及現任秘書長羅冠聰，其中周永康承認事件中「好傷」，原因係不斷自我怪責同自我否定，包括係咪個人能力不足、無能還是判斷失誤，令到整場運動失去方向；羅冠聰講到佔中更疑似不堪回首咁，話唔想詳細咁回看事件，仲話當初身邊嘅人好有衝勁同理想，事隔一年大家都回復正常生活。睇嚟學聯五子經過一年洗禮，好似比之前更迷失咁喎。
另一方面，近日頻頻接受訪問嘅佔中發起人戴耀廷，繼續死撐佔中係和平進行，同時唔認同佔中損害香港法治，事後亦無出現任意違法嘅活動，睇嚟佢比學聯五子更為唔清醒，繼續活喺自己嘅世界中。