《明天會更好》呢首經典名曲，相信好多人識唱，可惜吖，唱歌還唱歌，現實還現實，回歸十八年來，香港明天唔係變得更好，而係變得更差。正如「東方報業民意調查」顯示，多數市民對港府信任度持續下跌，對香港前途失去信心。
唔係杞人憂天（口架），港府管治混亂，烏龍百出，而反對派又搞搞震，法治嚴重受損，加上營商環境惡化，競爭力下跌，港人又點可能有信心吖。呢，近日有項大學調查發現，市民無論係對港府嘅信任度，或者係對香港前途嘅信心指數，都跌至沙士後新低，同「東方報業民意調查」嘅結果不謀而合。
又難怪市民咁悲觀嘅，淨係舊年嘅佔領之亂咋，就害到香港雞毛鴨血，幾乎萬劫不復，家陣一年過去嘞，當局話就話檢控咗百幾人，可惜全部係蝦兵蟹將，主要搞手及黑手依然逍遙法外，風流快活。尤其係涉及淫賤黎嘅黑金醜聞，查來查去都冇下文，更加令人莫名其妙。仲有吖，曾蔭權爵士嘅貪腐案曝光超過三年半，廉署查到依家仲係無聲無息，律政司檢控專員聲稱短期內有決定，結果又係大隻講，如果話背後冇蠱惑，三歲細路仔都唔信啦。
所以話，港府有法不依，執法不嚴，法治精神蕩然無存，咪就係所有亂象嘅根源囉。「東方報業民意調查」發現，多數受訪者批評律政司唔敢打大老虎，令市民對執法及檢控部門失去信心；亦有唔少受訪者認為港府有法不依，嚴重衝擊法治，形成唔尊重法治嘅文化，後患無窮。
冇錯嘞，就係因為港府畏首畏尾，投鼠忌器，嗰班牛鬼蛇神至會有恃無恐，愈來愈激。大家有眼見，近年反對派政客大搞不合作運動，為反對而反對，為拉布而拉布，連創科局等民生議題都唔放過，立法會固然空轉，港府施政更陷於癱瘓咁滯。唔少受訪者批評反對派政客無事生非，唔止影響港府管治，而且損害民生，唔係冇理由（口架）。
當然喇，物必先腐而後蟲生，香港搞成咁，政客有責任，港府亦有責任。淨係講大型基建咋，一味拖拖拉拉，搞到無一不延誤，無一不超支，淪為一個個財政黑洞，都咪話唔大鑊。好似港珠澳大橋咁吖，唔止出現飄移，路政署仲被踢爆擅自減樁，簡直七國咁亂。
都係古人講得啱，禍福無門，唯人自招。今時今日，行政、立法、司法各有各亂，各有各廢，成個香港烏煙瘴氣，營商環境又好，整體競爭力又好，或者宜居城市指數又好，幾乎全線下跌。面對咁嘅環境，港人有信心至奇吖！