鉛禍未去，洪水驟來！福地變凶港，老朽不幸而言中，香港嘅「福地」氣數，配額已用完！彩虹道為何冇彩虹？傻仔！羅大佑都唱：皇后大道中為何冇皇宮？彩虹道冇彩虹，只有滔滔洪水有冇咁出奇啫？
一場短暫黃雨，搞到彩虹道變「彩虹河」，三分鐘內積水一米深——浮起的士，近二百輛車被困，癱瘓東九龍交通，而新蒲崗工廠區和居民區亦被淹沒，河道旁的建材雜物沖出馬路，用於分隔行車線的水馬亦被沖跌及浮起……明日香港，一場短暫黃雨竟可以上演「四海翻騰雲水怒」，你話香港唔沉淪都冇人會信喇！
黃雨傾城，香港呢個「福地」原來好脆弱，老朽真係唔敢想像，若然來多一兩場紅雨、黑雨，香港唔通就咁玩完？老朽又聯想起法國大文豪雨果曾講過：下水道是一個城市的智慧與良心。而台灣嘅龍應台亦在一篇散文講過：最好來一場傾盆大雨，足足下它三個小時，如果你撐傘出去蹓躂了一陣，發現褲腳卻不髒，交通雖慢，卻不堵塞，街道雖滑卻不積水，這大概是個發達國家；如果發現積水盈尺，店家的茶壺漂到了街頭，小孩子在十字路口撈魚，這大概是個發展中國家。
龍大姐，咪玩啦！香港一場短暫嘅黃雨，都搞到黃大仙彩虹道一帶雞毛鴨血、七國咁亂，如果真係落咗三個鐘頭，香港呢個國際金融中心，肯定回到一百五十多年前嘅小漁村，唔好話店家的茶壺漂到了街頭，小孩在十字路口撈魚……老朽睇怕今年中秋，可泛舟街上，着住泳褲與大婆賞月，漂游的枱上有月餅、碌柚，倦了，有飄移而來的席夢思……一場傾城暴雨，讓香港重回小漁村都幾好㗎，渠務署同路政署起碼唔使狗咬狗骨，互相推諉責任；上天有眼，快來場三小時黑雨打救香港吧！