政情：明哥想搵外國勢力襄善舉
喺深水埗經營燒臘飯店嘅「明哥」陳灼明派免費飯畀基層派到出晒名。尋日中秋節，明哥獲邀為街頭音樂活動「Play Me, I'm Yours」，於深水埗街頭即席彈奏一曲。原來明哥小學時學過風琴，因此對樂理有粗略認識。尋日明哥喺一位港大醫科學生Thomas帶領下合奏一曲《月亮代表我的心》，又派燈籠畀途經街坊，齊齊應吓節，增添佳節氣氛。
盼助少數族裔
講起慈善大計，明哥話正計劃緊向政府申請成為一個獲認可嘅慈善組織，又指希望將服務延伸至南亞裔等少數族裔人士，於元朗開設一間主打素食嘅食肆，專門提供外賣及到會予南亞裔難民。
不過，佢話香港人捐嘅錢會用嚟幫番香港人，而外國人捐嘅錢就幫番外國人，所以嚟緊希望搵早前同佢一齊派過月餅畀露宿者嘅美國駐港總領事夏千福幫手，聯絡美國一啲財團，呼籲佢哋支持。但夏千福啱啱返咗美國，要成個月之後先返港，明哥要等吓先嘞！