政情：譚志源唔Buy港樓
本港最近股市市況慘淡，連帶樓市亦不被看好。早前發展局局長陳茂波講過，市民要對樓市加倍留神，個別地區計埋回贈等優惠之後，一手樓樓價甚至較同區二手樓便宜。唔單止陳茂波冇睇好樓市，就連政制及內地事務局局長譚志源（Raymond），最近都喺加拿大溫哥華買多咗個物業，而唔係喺本港置業。Raymond唔撐香港樓市，係睇淡後市，定係諗住退休後移民呢？
政改否決 反有心情買磚
政改一役令Raymond忙到氹氹轉，雖然最終政改方案以否決告終，Raymond未能交出令中央滿意嘅成績表，但似乎冇影響佢嘅心情，仲有心思跨海買樓。根據問責官員最新財務及其他利益登記，Raymond同太太上個月喺加拿大溫哥華買入一個尚未落成嘅住宅物業，打算用嚟自用。
睇番資料，Raymond喺上個月十三日至三十日曾經離港休假，相信呢幢物業有機會係當時買入。Raymond同太太原本喺中西區已持有一個住宅物業，亦申報作自住之用，今次新增一個溫哥華物業，雖然寫明係自用而唔係出租投資，但係都令人產生唔少聯想。
陳岳鵬任英華童軍團長
唔通Raymond好多親戚住嗰度，成日都要過去加拿大？定係買畀仔女住？抑或係睇淡本港樓市，轉戰外地置業以分散風險？我哋問過政制及內地事務局嘅發言人，知唔知該幢物業位於溫哥華邊度，以及用幾多錢買入，但係發言人話冇其他補充。
至於新任政制及內地事務局副局長陳岳鵬（Ronald）嘅申報，就同佢之前擔任政治助理時差唔多，包括申報係樂行童軍團團長。據知，呢個童軍團係英華書院嘅童軍團，而Ronald讀書時曾做童軍，所以母校就搵番佢做團長，至今做咗幾個月左右。