中環出更：南航連環延誤 玩殘馬逢國
航班延誤事件屢有發生，體育、演藝、文化及出版界立法會議員馬逢國上星期就畀南方航空玩殘！話說佢上周四原定乘搭南航嘅航班由西安去太原，點知班機延誤再延誤，搞到馬逢國錯失咗同朋友喺太原聚會嘅時間，馬逢國直言對南方航空真係好失望咁話。
「最嬲係無解釋原因」
身兼港區人大代表嘅馬逢國早前隨團去西安視察，原本諗住結束行程就搭機去太原參加「全國書市」活動，兼且同出席活動嘅香港出版商朋友食飯敍吓。點知原定下午一時五十分起飛嘅航班延誤到下午五點，到差唔多五點時又話要延誤到七點。馬逢國見趕唔到太原嘅飯局，就即場買咗張傍晚六點四十分返深圳嘅機票，諗住經深圳返港，點知都要延誤一個鐘先至起飛。
馬逢國話，去唔到同朋友食飯搞到佢唔開心，更加嬲嘅係南航至今都冇同佢解釋過點解班機會延誤又延誤，真係令人勁失望。
我哋致電南航內地客戶服務電話查詢，獲答覆九月廿四日當天由於「航班周轉原因」，導致航班一再延誤，結果該航班一直延至當晚九點廿二分先起飛。睇嚟馬逢國當機立斷決定不再呆等，都係幾英明嘅決定。
卓妮