中環出更：紀律部隊沙排賽 警精英雙冠
紀律部隊當中都有唔少運動健將，七月份代表香港喺世界警察及消防運動會中，奪得室內六人賽冠軍嘅警察排球會係其中嘅佼佼者。日前佢哋同本港多個紀律部隊舉行一場沙灘排球賽，一句唔該就攞走晒男、女子組冠軍，認真厲害。身兼警察排球會主席嘅警察公共關係科高級警司關翠貞（Catherine）就話，紀律部隊生活日夜顛倒，做運動可以調節吓，而沙灘排球只要四人就可以玩，練習起嚟夠晒方便咁話。
以前係排球員嘅Catherine話，紀律部隊搞排球賽就多，沙灘排球就係第一次。因為新一代警察中唔少九十後，佢哋都鍾意玩排球，所以就舉行今次球賽，等大家互相交流切磋。
做水警嘅黃駿安亦曾經係排球運動員，佢話做水警唔似其他警察周街行當運動，所以更加要堅持打排球保持體能。咁比賽前喺飲食上有冇乜嘢特別要注意嘅？佢笑笑口話只係唔好過飽，反而當更時注意嘅仲多，例如唔可以飲奶茶同食蛋，否則會嘔到七彩喎。
女懲教主任唔怕曬
唔少女仔都好怕曬黑，有份參加今次沙灘排球賽嘅懲教署懲教主任陳嫣婷就話，好喜歡打波，早已蓋過怕曬呢樣嘢，甚至覺得古銅色嘅皮膚仲靚咁話。
香港排球總會會長吳守基都有到場觀摩賽事。佢透露，下個月將會搞沙灘排球亞洲邀請賽，因為係國際賽事，所以啲沙都要符合國際賽要求，要特別幼細咁話。但佢慨嘆香港可以練習沙灘排球嘅場地太少，周末練波有難度喎！
卓妮