政情:今日你上鏡:工展攤位沽清 戴澤良感驚喜

中華廠商聯合會副會長兼展覽服務公司主席戴澤良(Tony)年初啱啱上任,首次擔大旗籌備工展會即遇上零售寒冬。Tony原本以為會幾棘手,點知展位出租情況好到出乎意料之外,唔止十二月喺維園登場嘅工展會展位迅速被搶晒,十月底喺葵涌舉行嘅食品嘉年華數百個攤位同樣供不應求。Tony話,商戶反應非常踴躍,仲爭做贊助商,佢哋嘅心態係反正冇乜生意,不如去工展會或嘉年華會博一博。

Tony仲話,有銅鑼灣附近商戶反映,工展會期間生意明顯差咗,因為市民都湧入去工展會,所以今次都有大商戶參展,事關計番條數,工展會租金都唔會貴過交開嘅舖租。

第一手消息請下載on.cc東網iPhone/iPad/Android/Windows Phone Apps