臭罌出臭草，廢官自然出廢App。香港郵政同消防處不務正業，醜聞多多，而佢哋出品嘅手機應用程式(App)同樣廢到冇朋友，仲要係有口皆悲嗰隻，簡直係廢中之廢，渣中之渣。
呢，近年潮流興Apps，港府亦趕時髦，單係過去兩年就使咗兩千萬元推出七十多個Apps，結果大都因為內容簡單，更新慢，下載少，以致得物無所用，簡直浪費公帑。近日有關注團體調查政府Apps，以開發成本、下載量、用戶及網民意見等為準則，嚴選出十大廢App，涉及八個部門，其中消防處同香港郵政嘅Apps更係廢到無倫，被形容為「渣中之渣」。
好似消防處個App咁吖，絕對可以話係應有盡冇，大廈管理知識以及後樓梯消防裝備標準等同市民息息相關嘅資訊，通通欠奉，反而要求用戶使用定位功能。喂，你講防火知識就講防火知識啦，用戶身處何方關你鬼事咩，更何況咁做有洩漏私隱之嫌？你話嘞，呢啲咁唔等使嘅App，點會唔乏人問津吖。嗱，咪睇小呢個廢App，淨係開發就已經花費九十萬元，仲未計每年四萬元營運開支，投入同效能完全唔成比例，納稅人真係冤哉枉也。
香港郵政嘅App亦係難兄難弟。唔少用戶批評既唔可以追蹤專遞郵件，追查郵件又經常出錯，衰過私營速遞公司多多聲，被形容為「寄不出的App」，唔怪得推出以來反應冷淡，下載次數只有五萬咁大把喇。最諷刺嘅係，由政府資訊科技總監辦公室設立、幫初創公司推介產品嘅「iStartup@HK」App，下載次數只得十個。連專責推廣資訊科技嘅部門都搞成咁，仲有咩好講吖！
即係咁，家陣人人一部智能手機，Apps更加如雨後春筍，政府推出App本來有助同市民溝通，弊在港產官僚有心無肺，為做而做，求求其其，點整得出好嘢吖。佢哋之所以熱衷搞App，除咗人有我有嘅心態，主要係部門經費不用白不用，用咗也白用，為免第二年削預算，梗係有理冇理整咗至算，整咗之後咪關人個關囉。其實正如專家話齋，好似消防局地址一類嘅資訊，唔會成日更新，用番現有嘅網站咪得囉，使乜多此一App啫。
正所謂，無咁大個頭唔好戴咁大頂帽，港府成日話要發展創新科技，仲話要成立創科局添，講就講得好聽，弊在科研投入遠遠落後其他鄰近競爭對手，連最簡單嘅公共WiFi服務都跑輸人九條街，家陣Apps又係咁廢，咪盞丟人現眼！