因應鉛禍蔓延學校，教育局後知後覺為全港幼稚園驗水，教育局局長吳克儉（吳得掂）尋日就出來公布，話過去數日為十二間幼稚園抽取廿五個食水樣本，全部樣本的含鉛量都冇超過世衞標準。最搞笑係，吳得掂話唔會因此而鬆懈，會按部就班工作喎，唔知仲以為佢喺比賽奪得冠軍咁款，但其實只係完成十二間幼稚園驗水。全港有咁多中小學及幼稚園，單係嚟緊要驗水嘅官立中小學及特殊學校就有八十間，如果期間出現「甩轆」，到頭來又要搵司長出來補鑊就弊喇！
